香港有咩設施係密過公廁？
密過公廁即係有幾密？
人口密集嘅城市自然需要密集嘅日常社區設施。喺街道入面隨處可見，唔同種類嘅日常設施到底有幾密？呢篇文章搵咗幾種日常設施嘅數據，分析吓佢地有幾密。
無奬問答遊戲
問題：請由多至少排列以下設施的全港總數
- 便利店（只包括 7–11 同 OK）
- 停車場（包括露天停車場／工商廈停車場／住宅停車場／政府多層停車場，但唔包街邊咪錶位）
- 自動櫃員機（所有持牌銀行嘅櫃員機）
- 巴士站（唔包括紅綠 van 車站）
- 郵筒
- 公廁（唔包括郊野公園入面嘅公廁）
答案先賣一賣關子，下面首先俾大家睇一睇幾種設施係香港嘅分佈。
（背景音樂：百萬富翁快而準思考時間）
便利店
停車場
自動櫃員機
巴士站
郵筒
公廁
設施總數
答案由多至少，正確嘅次序係：
（背景音樂：百萬富翁快而準公佈答案時間）
- 巴士站（4,230 個）
- 自動櫃員機（2,131 個）
- 停車場（1,620 個）
- 便利店（1,276 間）
- 郵筒（1,158 個）
- 公廁 （809 間）
下面係一個 bubble chart，每個唔同顏色嘅圓形代表一個設施，而圓形面積係按設施總數依比例畫成。呢張 chart 可以方便比較唔同設施總數嘅差距有幾大。
舉兩個我認為幾意外嘅發現：
- 停車場總數原來仲多過便利店（但唔計露天停車場嘅話，其實全港停車場總數係唔夠 1,000 嘅）
- 全港有成千幾個郵筒（不過有無人用就另一回事）
咁即係有幾密？
知道唔同設施邊樣多啲，邊樣少啲，但個總數又代表咩？當一種設施密過公廁嗰陣，又即係有幾密？
已知香港大約有 275 平方公里嘅土地係已發展 / 建設土地²，又已知維多利亞公園面積大約係 19 公頃（0.19 平方公里）。按比例計返³，你會喺一個維園咁大面積嘅已發展土地搵到 0.56 間公廁，0.8 個郵筒，0.88 間便利店，1.12 個停車場，1.47 個自動櫃員機同埋 2.92 個巴士站。
下面個表格可以用黎參考，將設施總數轉換做兩個標準：
- 一個維園咁大嘅已發展土地會有幾多個設施？
- 幾多個維園咁大嘅已發展土地先會有一個設施？
當設施總數唔多，用第二個標準會容易理解啲。而設施總數多嗰陣，用第一個標準會比較好。始終，整數比有海量小數點嘅數字容易理解，如果唔係，點解小學嗰陣點會學完整數先學小數呢。
小結
以前讀 urban design course 嗰陣，lecturer 成日都好強調畫 masterplan 需要有 spatial sense 同埋 scale sense。簡單咁講，就係當人地問你「10 米有幾長」嗰陣，你個腦要即刻想象到 10 米喺現實有幾長，同埋講得出一堆現實例子（例如兩個中型街舖舖位／一條四線車路）。
如果你問我，寫呢篇文有乜意義，我會話，之後如果有新聞講某設施有幾多間嗰陣，你都可以攞上面堆數做一個基本 benchmark，知道嗰個設施： 1. 大約有幾密，2. 比起其他常見城市設施有幾密。
正如話全香港有差唔多 8,000 幢有歷史價值嘅建築，就咁拋個數出黎，唔好話一般人，就算研究開城市嘅人都好難即刻想象到係有幾密。正因為咁，大家日常生活都會話「個樓盤有幾個多足球場咁大」，用一啲比較容易掌握到嘅事物去理解數據。就算講緊城市規劃嘅範疇，香港規劃標準與準則（HKPSG）入面都會寫每幾多居民需要一個設施，或者每幾多平方公里需要一個設施咁樣，將設施需求用 per capita / per unit of land 咁樣寫。
作為門外漢，就算理解唔到規劃標準入面堆數字嘅制訂理由，都起碼可以理解到堆數字講緊乜。
免責聲明
由於部分設施嘅位置數據（即係經緯度）唔係完全準確，地圖上顯示嘅設施位置有機會同實際有些少出入。而數據無完整核實過，同埋唔係最新版本，設施總數亦都有機會同實際有出入。
[1] 注意呢個列表唔包括郊野公園入面嘅公廁，因為郊野公園入面嘅公廁係由漁護署管理
[2] 根據2019年香港土地用途。已發展土地包括以下幾類：住宅、商業、工業、機構／休憩、運輸、其他都市或已建設土地
[3] 呢度假設所有公共設施係平均分佈喺全港嘅已發展土地 （即 uniform spatial distribution）。現實係有啲地區設施特別密，而有啲特別疏（睇返上面幾張地圖就清楚）
