地圖解：邊度有大家樂，邊度有大快活？

連鎖港式快餐店分店第一章

按：本文係兩篇探討連鎖港式快餐店系列嘅第一篇，第一篇分析兩間連鎖集團嘅店舖喺邊度以及分布，第二篇就會分析邊啲地方又有大家樂，又有大快活。第二篇會之後出。

連鎖港式快餐店分店喺邊度？

大家樂（0341）同大快活（0052）兩間連鎖港式快餐店集團喺 6 月公佈咗全年業績。兩間集團嘅年報入面都提到佢哋喺香港有幾多間分店：大家樂有 172 間，而大快活有 158 間。

「地圖解」呢個系列，就係用地圖去解答問題。呢啲問題，十居其九都係筆者行行吓街，上上咗網嗰陣諗出嚟。今次條問題，就係睇完兩篇業績新聞之後，腦入面諗到嘅一條問題：

邊啲地方又有大家樂，又有大快活？

呢個「連鎖港式快餐店」主題，會分做兩篇 blog，解答兩條問題：

• 第一篇：兩間連鎖集團嘅店舖喺邊度？分布係點？
• 第二篇：邊啲地方又有大家樂，又有大快活？

兩間快餐店嘅官網都有佢哋集團嘅位置，照舊做少少 data scraping 攞到分店地址之後再做 geocoding，就可以喺地理信息系統（GIS）入面 plot 返堆分店去答第一題，再分析返呢堆分店嘅步行範圍（專業術語叫 catchment area，有人譯做服務範圍，但唔太譯到個含意）去答第二題。

大家樂同大快活嘅分店喺邊度？

呢度揀咗中環、尖沙咀、黃大仙、深水埗同埋沙田五個地區，睇下唔同發展歷史（舊市區 / 新市鎮）同埋用途（商業區 / 遊客區 / 住宅民生區）嘅地方，快餐店分布有乜異同。

（如果讀者想睇某啲特定嘅區，歡迎留 comment）

中環

大家樂喺中環中心地帶（唔係李嘉誠賣錯價睇錯市嗰幢）開咗三間分店，喺香港站仲有兩間舖頭。雖然唔清楚核心商業區舖租幾多，但開到三間，都可以話中環打工仔食港式快餐嘅需求唔細，夠俾核心商業區商舖嘅租金。

大快活嘅足跡就明顯細好多，中環核心地帶入面只係得萬年大廈有一間分店，第二間離中心地帶最近嘅分店已經喺上環。

尖沙咀

由商業寫字樓區去到遊客區，大家樂分店都係比大快活多。

大家樂堆舖直情好似賽車遊戲入面環形賽道嘅檢查點咁，由柯士甸道開始駛落廣東道，再經梳士巴利道駛返入彌敦道一直路咁兜一個圈（希望有玩賽車遊戲嘅讀者明白我講乜嘢¹）。

大快活就只係得三間，而且每間舖之間距離都差唔多有成公里，喺尖沙咀開舖嘅意欲明顯唔高。

另外幾出乎意料嘅係尖東得一間大快活獨市（尖東係無美心MX嘅），照咁估人流都真係幾疏落。當然，另一個解讀係尖東多唔同種類嘢食，港式快餐店呢啲一般餐廳班打工仔同路人睇唔上眼。

黃大仙

兩間集團分店數目接近一樣，無之前中環尖沙咀咁懸殊，大家樂一面倒咁開。

黃大仙都係九龍入面非常之標準嘅屋邨社區 — — 最簡單嘅解釋，就係一幢幢十字型公屋居屋圍住一堆商場（當然仲有其他政府、機構或社區設施啦）。呢啲屋邨商場主要都係民生舖頭多，餐廳類型都當然係平民餐廳佔比極高。

黃大仙區入面基本上都係每間民生商場都有一間港式快餐舖，而兩間集團嘅比例比較平均。一座商場有大家樂，另一座就有大快活。啟鑽苑有間大家樂，荷里活廣場就有間大快活，再行上鳳德邨有一間大家樂。黃大仙中心直情係北館一間大快活，南館一間大家樂，好似兩個集團打緊默契波咁。

深水埗

深水埗雖然有唔少街舖（沿住成條長沙灣道都有唔少舖位），但可見兩間集團都較少會揀街舖開舖，而係同黃大仙一樣，偏向揀屋邨商場（幸福邨﹑白田邨同元州邨）或者重建住宅項目嘅平台商場（喜薈同曉尚），而西九龍中心作為深水埗入面最大型嘅商場，都有間大快活插旗。

南面近太子（即係塘尾）同埋元州以南兩個地區兩間集團都係絕跡。到底係因為兩間集團覺得呢兩個地區無足夠需求去開舖，定係搵唔到啱心水嘅舖頭租，就無從考究啦。

沙田

作為第一代新市鎮，沙田城市形態同之前四個港九地區都有大分別。大同工整嘅方格街區加上發展規模大，令到舖頭都會搬哂入商場，「街舖」呢個概念都消失咗一大半。

明顯地大快活喺屋邨商場開舖開得幾進取。沙角邨／博康邨／水泉澳邨只係有幾百米距離，但係三個屋邨商場都有大快活。城門河對岸都一樣 — — 連城廣場沙田廣場同瀝源邨都有大快活，相比之下大家樂只係喺新城市廣場有一間分店。

大圍嗰邊就變返係大家樂地頭。秦石顯徑美林都有大家樂，反而大快活就只係喺大圍站對出有分店。

寫住咁多先，下篇待續。