地圖解：公共交通黎講，青衣盈翠半島有幾「方便」？
由朝到晚，45 分鐘車程可到達範圍變化
前言：返工最方便嘅樓盤
話說上年上連登嗰陣見到下面呢個 post：
盈翠半島係咪全港返工最方便嘅樓盤？
- 分享自 LIHKG 討論區
https://lih.kg/3353338
要答呢一條問題，首先要定義到「最方便」，以至係「返工最方便」。但方唔方便，永遠都係由「返工返邊度」決定。你喺川龍茶樓返工嘅話，川龍村堆村屋對你黎講係返工最方便嘅樓盤添。
所以諗咗幾分鐘之後，就只能夠話呢條問題個答案又係「It depends」。
想了解一個樓盤方唔方便，首先應該要理解喺特定時間內，你能夠由呢個樓盤去到咩地方。即使我答唔到呢個樓盤係咪「方便」，都可以提供一啲數據、圖表或者地圖作為參考指標。
樓主講嘅「方便」，如無意外應該都係講緊搭公共交通工具所需要嘅時間。
公共交通同私家車以及行路最唔同嘅係，車程大程度上係由出發時間決定。你揸私家車嘅話，唔計塞車，喺下晝四點出發去唔同地方嘅車程，基本上同你凌晨四點出發嘅時間差唔多。但搭巴士同地鐵嘅話，凌晨四點已經唔好話有幾多車，剩係有車已經要感恩。古語有云「男人到左三十歲仲要依賴交通工具好可憐」， 喺香港呢個公共交通工具發達嘅地方，日頭都唔係好覺，但係凌晨無車嘅時候，你會即刻明白呢句野嘅真諦。
如果係咁，我地可以將原本要答嘅問題，換做一條相關，但係更加具體嘅問題：
喺一日之內唔同時間，由盈翠半島出發，45 分鐘之內可以去到邊啲地方？
當你住喺盈翠半島，一日之內唔同時間出門口，有咩地方係你 45 分鐘之內可以去到或者去唔到？而去到嘅地方，係多定少？了解到唔同時間可以到達邊啲地方，就可以租略咁量化呢個樓盤係唔係對你嚟講係「方便」。
全日可到達範圍變化
下面張動態地圖顯示咗唔同一日之內由凌晨十二點去到夜晚十一點，每隔一個小時由盈翠半島出發，45 分鐘之內可以去到嘅地方。
要詳細咁樣睇，可以將每個小時嘅出發時間地圖獨立咁睇。下面將一日分做唔同時段，詳細講解一下可到達範圍嘅變化。
頭班車
青衣去香港站嘅地鐵頭班車係 05:59，但清晨（呢個清晨唔係林超英嗰個清晨）時份，列車班次都仲係疏，甚至有啲巴士連頭班車都未開。
對應返可到達範圍，可見 45 分鐘車程去到嘅地方只係包括葵青區同埋荃灣市中心，加埋油尖旺同深水埗區。地鐵黎計，荔景等轉車轉荃灣綫都應該要等唔少時間。
朝早繁忙時間
朝早繁忙時間巴士同地鐵開得特別密，45 分鐘之內可以去到嘅地方自然比較多，去到嘅範圍自然大過其他時間。睇返地圖，可到達範圍基本上覆蓋成個港島北，返中環返灣仔返銅鑼灣返港島東嘅打工仔都可以喺 45 分鐘之內返到公司。
尖沙咀以至旺角當然喺可到達範圍入面，就算講緊去到九龍東咁遠，45 分鐘之內都勉強可以去到觀塘市中心（唔熟巴士路綫，呢度要麻煩其他人補充吓青衣朝早繁忙時間有咩特別班次去其他商業區）。
日頭（正午前）
繁忙時間過後，45 分鐘內可以到達嘅範圍明顯縮細，最明顯係港島北：北角同鰂魚涌都唔再係可到達範圍入面。至於九龍區嘅範圍就無明顯變化：你仍然可以喺 45 分鐘之內去到油尖旺同長沙灣深水埗，但九龍東地區最遠就只係去到九龍灣。
下晝
基本上下晝時間 45 分鐘車程去到嘅範圍同上晝都係差唔多。
夜晚
過咗收工時間，九龍嘅可到達範圍更加縮細咗。紅磡、黃埔、土瓜灣等等九龍城區入面嘅地區都已經喺「45 分鐘可到達範圍」以外。再睇埋香港島，都只係覆蓋中環附近地方，灣仔銅鑼灣都已經唔再喺範圍入面。
尾班車
去到凌晨十二點，都姑且仲有車（唔知巴士定小巴）載人由青衣返去大圍。而你想去荃灣、葵涌市中心或者上葵涌，喺呢個時間都仲有公共交通工具帶你過去。
之於深水埗東北面範圍，應該係對應緊龍翔道嗰幾個巴士站。
凌晨
呢個鐘數，你肯定你係想搵 public transport，而唔係搵 uber？
咁篇文到底想講咩？
當大家話「某個屋苑好去其他地方好方便」（規劃師說法就係高可達度／high accessibility），通常就會去咗拗「點先叫方便」，再拗「去邊度邊度要幾耐時間」。
但有一樣野好容易喺呢個問題上忽略咗嘅，係「唔同時間」去邊度邊度要幾耐時間。
有啲地方可以係朝早成堆晨早特快專線，如果喺朝早繁忙時間出發，去邊都會好快好方便。但過咗呢段時間，堆巴士就減到每半個鐘先一班，可到達範圍亦大幅縮細，咁樣算唔算「方便」？
或者，有啲地方係每 10 分鐘先有一班巴士，繁忙時間唔會增加班次，但非繁忙時間都唔會減班。整日嚟睇，你唔會去到好遠嘅地方，但亦唔會係臨收車嗰陣去唔到其他時間去到嘅地方。咁樣嘅話，又係算係「方便」？
一個屋苑嘅方便程度，取決於你喺唔同時間去到邊度。上面堆地圖見到，隨住出發時間變化，同一時間車程嘅可到達範圍都會有所不同，呢種差異，正正凸顯咗一個屋苑嘅交通便利程度，「方唔方便」，並非靜態嘅 statistics，而係隨著唔同時間，會呈現出多樣嘅變化。
你所到嘅地方，牽涉到空間（space / spatial）；而你出發時間，就涉及到時間（time / temporal）。由此推斷，我哋可以話，一個屋苑嘅方便程度實際上係一個時空（spatiotemporal）問題。
而 Spatiotemporal data structure 同 analysis，本身就係 computer science / Geospatial science 學術領域入面其中一個研究主題（例如 ScienceDirect 嘅 Topic Summary）。
即係話，如果唔太嚴格分類，呢篇文都係一篇學術文章黎。
