香港專營巴士公司服務範圍一覽
城巴＋新巴＋九巴＋龍運＋嶼巴＝？
九巴？關我乜事？
作為港島人，我搭九巴嘅次數可謂寥寥可數，對面海巴士路線嘅認知更加係同零無分別。當住九龍新界嘅 friend 成日話要睇九巴 app 去 check 下一班車幾時先到嗰陣，我想話我連九巴 app 都從來未裝過。
龍運同大嶼山巴士就簡直如同陌生人。我搭過幾多次龍運巴士？可能同搭輕鐵次數差唔多。圍起上黎，山手線/中央線/銀座線我搭得仲多。大嶼山巴士我搭過幾多次？應該同 Picadilly Line 差唔多掛。
之不過，點解住香港就同九巴絕緣？最基本嘅答案就係九巴主要服務九龍同新界。之不過，再深入一層咁睇，每間巴士公司，每條巴士路線嘅實際服務範圍係喺邊？
巴士公司主要服務範圍
翻查 Wikipedia 同埋巴士大典，五間專營巴士公司嘅主要服務範圍大致如下：
- 城巴：香港島及過海巴士、機場及北大嶼山巴士
- 新巴：港島巴士路線、來往港島至九龍及新界的過海路線，以及少量西九龍和將軍澳巴士路線
- 九巴：全港九新界，無特定服務範圍
- 龍運：香港國際機場、亞洲國際博覽館及東涌來往新界區大部分地區
- 嶼巴：大嶼山各地，梅窩、大澳、昂坪寶蓮寺、東涌等
既然係咁，可唔可以睇吓到底香港唔同地方係由邊一間巴士公司「主導」？
大地圖
服務範圍還服務範圍。實際上每間公司每條巴士線嘅行走路線係點？
上面嘅地圖顯示咗全港巴士路線嘅走線，並用唔同顏色代表路線營辦公司。巴士路線嘅行走路線好多時侯都會重疊，所以每條巴士路線喺地圖上都用咗稍有透明度 ¹ 嘅顏色代表（如果用完全實色代表每條路線嘅話，只會顯示到一條路線嘅營運辦商）。顏色越深代表越多巴士路綫會駛經嗰條道路，反之越淺代表越少巴士駛經嗰條路。
好阿媽係女人地，主要幹道同埋高速公路通常都係極深色。深色道路基本上可以分為兩類：第一類係穿越主要商業地區嘅街，例如英皇道、彌敦道。第二類就係快速公路（Expressway）同埋隧道，例如西九龍公路、吐露港公路同大欖隧道。
註：聯營路線會用兩間公司混合得出嘅顏色表示。比如 102 係新巴同九巴聯營，而藍色同紅色分別代表新巴同九巴，所以 102 會用 紫色 表示。
按公司分類地圖
之不過，將五間公司嘅路線放哂喺一齊，對只係想研究其中一間公司路線就唔多有用。下圖喺另一個地圖版本，將大地圖巴士路線按公司分類做五張細地圖（Data visualisation 術語叫 Small multiple ），獨立顯示每間巴士公司嘅路線。
重疊各間公司巴士線
將數據分類，好多時都係為咗睇吓唔同組別之間有無關係。呢巴士公司呢個例子，如果將唔同公司嘅路線疊埋一齊，出到黎嘅地圖會係點？將每條巴士路線嘅透明度調較到極之高嘅時侯，我地就可以透過唔同顏色嘅路線重疊所得出嘅顏色去觀察。
城巴＋新巴
城巴新巴名義上雖然係兩間公司，但 新巴母公司新創建集團喺 2003 年收購城巴之後 ，兩間巴士公司都已經隸屬同一母公司。但兩家巴士公司名義上依然係兩個獨立法人，各自以獨立巴士嘅專營權經營。
新巴當初成立係因為 1998 中巴專營權結束後，競逐中巴其下巴士路線（詳細歷史可以參考 巴士大典相關條目 ），而中巴巴士路線營運範圍主要係港島以及港島／九龍過海路線，所以新巴「起家」嘅路線都當然主要係喺港島範圍。
九巴＋龍運
龍運同九巴其實係姊妹公司。龍運成立係因為九巴想競投機場巴士線嘅營辦權，所以龍運巴士線都集中喺屯赤同埋北大嶼山公路，同九巴好少直接路線重疊。
城新九
將三間主要巴士公司用三原色表示嘅其中一個原因，係三隻顏色重疊就會變成類黑色嘅顏色。可見喺港島北範圍，由銅鑼灣去到西營盤（西隧口附近）都有齊哂三間巴士公司嘅路線。
點解會咁?
本文一開始提到每間公司嘅大約服務範圍。透過上面幾張地圖，我地可以更詳細咁顯示每間公司喺實際上喺邊幾個位置「霸地盤」。之於點解嗰個地區會係由嗰間巴士公司主導？背後有太多歷史同其他因素，唔能夠用三言兩語就可以完全解釋。呢度舉兩個例子做引子，俾大家初步了解唔同地區嘅巴士路線主要營運公司，同埋背後歷史。
新界西
喺新界西範圍，城巴九巴龍運都有唔同路線經過元屯天三個大區。不過，元朗地區都係九巴獨市，但點解天水圍有部分範圍係城巴地頭？呢個可以追溯到九十年代，當時城巴同長實合作，開辦嘉湖山莊居民巴士路線（詳情可見 巴士大典城巴條目歷史章節 ），結果逐漸發展成喺天水圍開辦一堆來往市區嘅路線，「入主」部份新界西。
將軍澳
1999 年，運輸署就將軍澳南巴士路線經營權招標，而新巴成功中標。本身獨市經營將軍澳來往市區嘅九巴就無入標。之不過，喺「以鐵路為骨幹」嘅政策下，2002 年將軍澳綫通車之後，居民大多都選擇乘搭地鐵，（我喺另一篇文都用過地圖去探究呢個趨勢），當初其中幾條巴士線都已經停辦。
將軍澳嘅巴士線數量比起其他新市鎮亦都係比較少。所以喺地圖上面將軍澳巴士線嘅顏色都比較淺。
小結
搭巴士嗰陣，大家有無曾經諗過點解嗰條路線會係城巴/新巴/九巴營運？經過巴士站嗰陣，大家望住個站牌，又有無數過有幾多條九巴線，有幾多條城巴線？見到運輸署批新巴士路線嗰陣，大家又有無睇過係九巴中標定係城巴中標？
巴士專營權自身已經係一個值得深究嘅題目。城市入面嘅日常事物，好多時都會有一啲 hidden spatial pattern 喺後面。至於巴士路線有幾多 hidden pattern？我希望呢篇文俾到其中一個。
¹ 喺呢張地圖入面，每條巴士線嘅顏色透明度係 7.5%。
