看見數據：城市規劃委員會 2023 年所處理的規劃許可申請
由 753 宗規劃申請窺探香港城市發展
按：本文基本上係寫俾從事城市規劃行業嘅人睇 ，所以假設咗讀者對香港城市規劃制度有一定認識。如果你睇唔明篇文講乜，可能你唔係呢篇文嘅目標讀者，又或者係我寫得太複雜太 1999 （原因應該係後者居多）。
前言：咩規劃許可申請?
城市規劃唔算係冷門嘅議題，但規劃許可申請（s.16 Application for permission）應該算係。起碼「規劃許可申請」呢幾隻字，真係無幾可會係報紙見到，通常報紙都只係寫「發展商向城規會申請將用地乜乜乜乜乜」咁。
ChatGPT 50 字簡介「規劃許可申請」：
「規劃許可申請」是指在香港進行土地開發或建築工程時，申請人需要向城市規劃委員會提交的申請程序。城市規劃委員會負責評估申請文件，根據相關法規和規劃要求，決定是否批准該土地開發或建築工程。
真係會用呢類專有名詞，甚至會列明個申請係屬於 s.16 定係 s.12A 嘅，應該只會喺政府文件同讀書時嘅 lecture notes 出現。
而規劃署年報都會提到當年署方處理咗嘅規劃許可申請總數，例如 2022 年年報（2023 年年報未出）就寫到「本署於二零二二年處理了 1,142 宗規劃許可申請」。
年報固然可以就咁俾完個總數就算，但作為要打爛砂盆問到篤嘅人，應該就會即刻追問：
「咁呢啲申請係咩申請黎?」
追問問題唔難，但要問得精確（問題可以回答到，而且有回答嘅價值）就唔簡單。當我地問呢啲申請係「咩」申請，其實係想知申請嘅咩特徵？
用最基本嘅六何法，呢度嘗試問三個問題：
- What — 呢堆申請屬於咩類型?
- When — 呢堆申請城規會係幾時作出決定?
- Where — 呢堆申請係喺邊度？
2023 年城規會一共審議咗 753 宗規劃許可申請（並不包括延期申請），呢度嘗試用唔同圖表同地圖回答呢幾條問題，同時承接返上年回顧 2022 年規劃申請嘅文章¹。
問：753 宗規劃許可申請係咩概念?
話就話要解剖吓呢堆申請係咩申請，但其實有一個更加基本嘅問題要答：
一年之內處理咗七百幾宗規劃申請係咩概念？實際上係多定係少？
呢度就顯示返由 2018 年開始，城規會每年處理咗嘅申請總數。
2023 年嘅總處理宗數比過去五年任何一年都多。至於點解？我都想知，亦都唔係呢篇文嘅重點²。
當然，每宗申請嘅性質都好唔同，背後需要理解嘅脈絡可以好簡單，亦都可以好複雜。一單大申請可以複雜過十單普通申請，所以唔應該將每宗申請嘅複雜程度一視同仁。市區嘅規劃申請，通常都比郊區申請複雜。喺市區，剩係考慮申請地點嘅同附近地區嘅特性（surrounding context）協唔協調，都夠玩你一段時間。
言歸正傳，睇返只係 2023 年嘅申請。
問：呢 753 宗申請係屬於咩類型?
用返上年嘅分類方法，將規劃許可申請分為五大種類方便大家理解，方便理解申請嘅性質：
- 「第二欄」用途（Column 2 Use）
- 「第二欄」用途（丁屋）（Column 2 Use (Small House)）
- 填土（Filling of Land） — 包括河道改道，填土／填塘工程等，常見於農業地帶
- 放寬發展限制（Minor Relaxation of development parameters） — 放寬地積比（plot ratio, PR），總樓面面積（gross floor area, GFA），建築物高度限制（building height）以及／或其他發展限制
- 臨時用途（Temporary Use）
而下圖顯示咗每種申請類型嘅總數。
有差唔多一半（51%）係屬於臨時用途類別，佔成 387 宗。第二多嘅係填土填塘，有大約 137 宗，佔大約 18%。丁屋排第三，然後第二欄用途第四。最罕有嘅申請類型係申請放寬發展規範，只係得 46 宗。
點解會咁？主要原因可能係臨時用途嘅定義可以好廣泛。大部份喺新界棕地嘅發展，都可以某程度上當做「臨時用途」。
下面列出幾個屬於臨時用途嘅申請做參考例子，如果想詳細理解申請內容，可以根據返申請編號上城規會網站查閱。
問：呢 753 宗申請係喺幾時處理？
雖則城規會無暑假寒假，但大家返工都有分旺季淡季，而收到嘅規劃申請數量都有旺季淡季。有啲時候，可能會突然有成堆 case 湧入黎，令到城規會需要喺一次會議入面一次過處理大量申請。
咁每次開會城規會處理幾多宗申請？下圖顯示每次城規會會議入面每個 DPO 處理嘅申請數量。
明顯地每次會議入面鄉郊及新市鎮規劃小組委員會（RNTPC）需要處理嘅宗數都比都會規劃小組委員會（Metro）多。Metro DPO 可能隔兩三次會議先有 s.16 要審議，但 RNTPC 基本上每次會議都有 s.16 需要審議。
之前都強調過，市區嘅規劃申請通常比較複雜。雖然總處理宗數比起鄉郊及新市鎮地區規劃處少，但計返審議及預備每宗申請嘅時間，實際上分別可能唔大。
如果只係睇鄉郊及新市鎮嘅申請，大約可見二月到四月 RNTPC 處理宗數比較少，但比起平均都唔算有大變化，大約每次會議處理 20 宗申請。而比起其他地區規劃處，西貢及離島 DPO 需要處理嘅申請明顯比其他三個鄉郊 DPO（沙大北、粉水、屯門）少。
最多同最少申請係邊一次會議？2023 年處理數量最高峰係喺五月中嘅第 719 次鄉郊及新市鎮規劃小組委員會會議，成個會議審議咗 48 宗申請，當中沙大北佔 19 宗、粉水 15 宗、屯門元朗西 13 宗以及西貢離島 1 宗，份英文會議記錄有成 107 頁咁長。
而最少嘅係四月尾嘅第 717 次會議，只係有 13 宗申請（粉水 7 宗、沙大北 3 宗、屯門元朗西 3 宗），對比返份英文會議記錄就只得 57 頁。
至於 Metro，可見一般每次會議都只係有兩三宗申請需要審議。十一月開始甚至連續有三次會議（第 730 次至第 732 次）所有 s.16 申請都只係要求延期，甚至無 s.16（雖然有 s.12A）。
問：呢 753 宗申請係喺邊度？
一開頭講規劃申請最重視嘅，就係申請地點嘅周邊環境。咁堆申請係喺邊度？
香港島／九龍／西九龍
市區嘅申請無咩特別 pattern，固中原因當然包括本身規劃申請比較少。
屯門元朗西
鄉郊新市鎮就完全係另一個世界，好明顯見到唔同 DPO 嘅申請有大分別。甚至一個 DPO 入面兩張相鄰嘅分區計劃大綱圖入面，申請種類都可以好唔同。
屯門元朗西基本上係一堆臨時用途，集中喺唐人新村、大棠以及洪水橋廈村一帶。換句話講，你離開元朗市中心同天水圍之後見到嗰堆棕地，好大機會都係申請過（甚至係申請緊）做臨時用途。例如唐人新村，欖堤東路／欖堤西路同公庵路兩邊都有一大堆臨時用途申請。另一個地區係洪水橋同廈村，都係一堆申請。
直接喺 SPP3 睇返一帶所有過去規劃許可申請，都已經可以靠肉眼理解到呢區嘅申請有幾頻密。
沙田、大埔及北區
丁屋申請喺沙大北比較多，主要集中喺九龍坑﹑林村以及軍地幾張圖。至於沙田同大埔新市鎮嘅所屬 OZP，基本上入面嘅規劃申請都同市區無異。
粉嶺、上水及元朗東
大部分申請都係填塘，最明顯就係錦田北一帶，其次係八鄉。申請可以話係圍繞住成個石崗機場。
至於以前嘅新田 OZP（即係喺 3 月變咗做新田科技城 OZP）範圍，可見都係同屯門元朗西一樣係以臨時用途為主。
西貢及離島
有時有啲丁屋申請咁囉，完。
西貢離島 DPO 收到嘅申請都係比起上面三個鄉郊 DPO 少一大截（對應返上面「申請係幾時處理？」嘅圖表）。申請少之餘仲要橫跨哂全港東面同西面，令到堆申請好稀疏，唔會有咩特別 spatial pattern。
咁篇文到底想講咩？
正如文章一開頭講咗，呢篇文係俾有城市規劃背景嘅人睇。做得 urban planner，自然就需要跟 case 處理規劃申請，變成唔多唔少都會對某啲 case 特別有印象。
不過去到最尾，大家對住嘅 case 都只係會變成年報入面個總數。化繁為簡喺年報當然有需要，但身為分析開分據嘅路人甲，又會覺得得個總數講唔到成件事。
點樣將一個總數變到更立體？又或者，點樣喺一堆 raw data 同一個總數之間搵到一個平衡，講吓主要趨勢同時，又可以顯示到每一宗申請，等個數字唔好咁離地咁遙不可及，更加唔好同大家工作入面嘅回憶扯唔埋？
呢篇文，某程度上只係喺規劃署年報入面一堆正常人唔會想知嘅總數上面，加多少少 context，立體啲咁理解不同地區規劃處過去一年嘅工作。
如果咁做可以幫到班同行解吓悶，都算功德無量掛。
技術附註—數據來源
- 每宗規劃申請嘅詳細資料來自城規會「規劃申請及法定圖則的統計資料」
- 規劃申請地點來自城規會「按照城市規劃條例第12A條、第16條及第17條提出的規劃申請及第17B條提出的規劃上訴」
[1]: 老老實實，個人唔多滿意上年呢篇，寫完之後重睇幾次，都覺得敍述太混亂。
[2]: 如果幾年後我仲寫緊文嘅話，可以攞呢個系列嘅數據做一次 longitudinal study 去答呢個問題嘅。
