地圖解：去到 2027 年，香港邊度人口會有增長，邊度人口會流失？

由每個小規劃統計區（TPU） 未來幾年間人口流動拆解 2027 年香港人口分布

TL;DR：未來幾年，香港每區人口會點樣變化？規劃署預測香港總人口去到 2027 年將會增加 14 萬，但係呢 14 萬新居民唔會平均分散喺香港每一個角落。本文拆解規劃署數據，用地圖去睇未來幾年香港人口分布變化，邊度會多咗人住，邊度又會少咗人。

前言：人口預測數據

眾所周知（即係大家都唔知），規劃署每年都會編製未來香港人口分布嘅預測數據。最新預測數據涵蓋十八區同埋每個新市鎮去到 2031 年嘅人口預測，以及小統計規劃區（Tertiary Planning Unit, TPU）去到 2027 年嘅人口預測。

規劃補充：咩係小統計規劃區（TPU）？

全港在人口普查／中期人口統計分為多個小規劃統計區，以供進行城市規劃。（中略）每一個小規劃統計區均以獨有的三位數字代表。首位數字代表所屬總規劃統計區的編號，而首兩位數字則代表所屬次規劃統計區的編號。

— — 小規劃統計區及單元區的界線說明

規劃署點樣估算每個規劃區嘅人口，呢度唔詳細講，有興趣嘅讀者可以直接將成份人口分布推算報告書餵俾 ChatGPT，叫佢幫手總結（我都 99.99% 肯定佢會總結得好過我）。

理解分析總人口數據，主要係圍繞住兩個時間點（通常係現在同埋未來某年）嘅變化，以及比較唔同地區嘅人口變化。直接講，就係要解答以下問題：

未來幾年，邊啲地區會特別多咗／少咗人住？

資料補充：2023 年香港總人口係有 750 萬，而去到 2027 年推算人口係有 764 萬。亦即係去到 2027 年，全港總人口會增長 14 萬人。

多咗嘅 14 萬人會住喺邊度，正正就係人口分布推算數據會答到嘅問題。

每區去到 2027 年會比而家多咗／少咗幾多人？

前提講完，終於入正題。

下面張地圖入面，每個箭嘴都代表住一個 TPU。藍色箭嘴意味住 TPU 喺 2023 年到 2027 年期間人口會所增長，紅色箭嘴就代表人口會減少。箭嘴嘅大細，反映人口變化程度：箭嘴越大，代表嗰個 TPU 嘅人口變化幅度越大。

如果你見到一個好大嘅藍色箭嘴，就意味住嗰區未來幾年會有大幅人口增長。相反，如果見到一個細紅色箭嘴，就表示嗰度人口會輕微下降。

呢張地圖，你會點樣理解？

我會話可以得出以下幾個重要觀察：

• 增長／下跌嘅 TPU 數量：藍色箭嘴（人口增長）多過紅色箭嘴（人口下跌），人口增長嘅 TPU 數量係少過下跌數量，可見人口會集中喺某幾個地區增長。
• 增長幅度嘅差異：有幾個 TPU 嘅人口明顯大幅增長，藍色箭嘴大到好搶眼，人口增加達到一萬人以上。相比之下，無任何一個人口減少嘅 TPU 嘅紅色箭嘴特別大。
• 增長同下跌幅度分布不平均：人口增長嘅 TPU 之間嘅增長量差異好大，有啲增加好多，有啲就少少。反觀人口下跌嘅 TPU，跌幅就相對平均，大部分都係中小型嘅紅色箭嘴。
• 市區／新界對比：香港島同九龍大部分 TPU 都係紅色，預示住市區人口呈下降趨勢。相反，新界北部就見到唔少藍色箭嘴，仲有幾個特別大，反映呢度人口會明顯增長。

下面第二張圖表就用另一種方式展示同一組數據：每條棒代表一個 TPU，由左至右排列；最左面係人口跌得最多嘅 TPU，中間係人口無乜變化，最右面就係人口增加最多。張圖都呼應咗上面頭三點。

人口增長最多嘅 5 個地區喺邊？

咁人口升幅最多嘅地區喺邊？下圖同上面張大地圖大致一樣，但特別標出咗人口上升最多嘅五個 TPU。

五個地區嘅人口總數增加排名如下：

1. 啟德：+76,600 人
2. 東涌新市鎮：+43,500 人
3. 秀茂坪／安達臣：+29,300 人
4. 屯門河西面：+28,900 人
5. 西沙／十四鄉：+22,100 人

點解呢幾個地區人口會升咗咁多？望住堆地名，你都應該大約估到答案 — — 無錯，就係未來幾年有大量新住宅供應，吸引人口遷入。

1. 啟德：先唔論啟德係唔係 CBD2，但啟德港鐵站附近嘅私樓同簡約公屋，加上跑道區附近嘅新供應陸續入伙，預計會令啟德規劃區到 2027 年增加差唔多八萬人。
2. 東涌新市鎮：主要係因為東涌東新市鎮嘅公營房屋發展，包括東涌北 99 同 100 區嘅翔東邨同雋東邨。
3. 秀茂坪／安達臣：呢度未來幾年會有一系列公屋同居屋相繼落成入伙。前幾個月開賣嘅三個居屋屋苑（安楹苑、安樺苑、安麗苑）就有差唔多 3,500 伙，用現時家庭住戶平均人數（average household size）2.6 人咁計，淨係呢三個屋苑就已經為呢區帶來大約 9,000 個新居民。
4. 屯門河西面：主要包括菁田邨同 NOVO LAND 嘅發展。單係 NOVO LAND 喺 2023 年到 2025 年就會分階段提供超過 4,500 個單位，估計會為呢區帶來大約 12,000 個新居民。
5. 西沙／十四鄉：呢度嘅人口增長主要係因為新鴻基嘅十四鄉項目。成個項目最多可以提供 9,700 伙，雖然唔係全部都會喺未來幾年落成，但都會為呢區帶來可觀嘅人口增長。

（點解上面寫到地產廣告咁…）

人口減少最多嘅 5 個地區喺邊？

睇完升，當然要睇跌。呢張新地圖同之前嗰張一樣，不過特別標咗出人口下跌最多嘅五個 TPU。

人口下跌最多嘅五個地區分別係：

1. 荃灣西：-7,800 人
2. 荃灣市中心／荃灣南：-7,700 人
3. 觀塘北：-6,000 人
4. 北角：-5,800 人
5. 馬鞍山：-5,800 人

人口分布推算報告冇詳細解釋每個規劃區人口變化嘅具體原因，所以少咗嗰堆人，有幾多係因為生老病死，有幾多係遷出該規劃區，係無從考究。

之不過，呢五個區份都無大型拆遷計劃，可以推斷人口下跌主要原因係因為死亡人口多（北角同觀塘北都係老年人口比較多嘅地區），同時有人口搬去其他地區住。而荃灣區喺呢個名單入面佔咗兩個位置（荃灣西同荃灣市中心／荃灣南），顯示荃灣區正經歷緊一個較大規模嘅人口結構轉變。

咁篇文到底想講咩？

同大家講規劃署係有呢一組地區人口推算數據，順手滿足自己整地圖嘅欲望。

真係得咁多。

附錄：人口變化係點樣推算？

（拎返讀書嗰陣堆 lecture notes 出黎）一個城市或者一個地區嘅人口變化，主要可以用三大因素去推算：

• 自然增長：出生及死亡人數 — — 出生同死亡人數嘅差額
• 外部遷移：境外遷入及遷出人口 — — 境外遷入同遷出人口嘅差額
• 內部遷移：境內人口遷移 — — 外區居民遷入以及區內居民遷出嘅差額

詳情可以睇返人口分布推算報告書第三章「推算方法」。