「另外嗰個」

邊個銅鑼灣?

我住銅鑼灣,不過係「另外嗰個」銅鑼灣。

地方理論上係無限,而地名亦都理論上係無限。但前人去嘅範圍有限,而聯想到嘅地名亦都有限。人會撞名,地方都會。香港作為彈丸之地,亦都有為數不少嘅重覆地名。

重覆地名入面,通常都會有一個多人熟悉嘅地方,而另一個係較少人認識。港島北有銅鑼灣,而沙田亦都有一個銅鑼灣。同人講喺銅鑼灣會合,正常理解都會係指港島北嗰個銅鑼灣。

另一個比較出名嘅「另外嗰個」要數西貢海下灣嘅灣仔。你同人講去咗灣仔買電腦,正常人都會理解到你講緊港島北嗰個灣仔;而你同人講去咗灣仔露營嘅話,行山友都會理解到你講緊西貢嗰個灣仔(如果你喺港島北嗰個灣仔搵到地方露營嘅話,可以話俾大家知)。

香港重覆地名

除咗上面提及嘅兩個重覆地名之外,香港仲有邊啲重覆地名?

下圖揀咗 13 個香港重覆地名,標注咗「另外嗰個」嘅位置。

如果你唔知「出名嗰個」喺邊嘅話,都可以對照返下表。

「灣」

都水潭漲,南北十餘里,水決南潰,下注爲灣,灣分爲二:西爲堵水,東爲滎源。

— 水經注 卷三十一

值得補充嘅係上表有唔少地名都係「灣」。參考香港地方入面嘅重覆地名列表,唔少重覆地名都包含「灣」字。無他,香港地形實在有太多海灣(三面環陸嘅海洋),所以有大量包含「灣」嘅地名。

而「另外嗰個」亦都可以唔止一個。以深灣為例,全港起碼有五個深灣(香港仔、南丫島、西貢蚺蛇尖、新界西北、索罟群島小鴉洲),而上表入面「另外嗰個」深灣係隨意選擇嘅。

當然,全港絕對唔止得以上嘅重覆地名,有興趣深究嘅讀者大可以去香港地方重覆地名嘅網頁(http://www.hk-place.com/view.php?id=118),入面詳細列出香港嘅重覆地名。

.

.

.

.

問:篇文完㗎啦?

係呀。

問:咁你呢篇文想講咩?

純粹想帶少少地理/地名冷知識俾大家。你問我有咩實際用途?我都答唔到,但(對我自己黎講)有趣呀嘛。你見到篇文又 click 入黎睇嘅話,對我黎講已經係成功有突啦。 🙃

問:咁呢張咁無聊嘅地圖個 idea 係點黎?

呢個地圖 idea 係源自 xkcd comic 。上年篇 comic 出嗰陣我已經想整香港版,但只係放咗佢喺 To-do list。直至前一兩個禮拜(三月中)嗰陣「香港地理達人挑戰」突然流行,其中一題就係考大家對重覆地名嘅認知。結果決定拎返呢個 idea 出黎整吓地圖寫篇短文。

雖則要再三強調個 quiz 只係考你地名/地圖認知,唔應該係「地理」測驗,但當佢係一個 small quiz 都無常不可。

--

--

Urban Data Science Enthusiast | Urban Planning | GIS | Maps | Data Visualisation | kennethwong12.netlify.app

Love podcasts or audiobooks? Learn on the go with our new app.

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store